Шӑмӑршӑ районӗнчи депутатсем пуҫиле ӗҫпе явап тыттарнӑ район пуҫлӑхне преми пама йышӑннӑ. Кун пирки КПРФ партин регионти уйрӑмӗ Телеграмра пӗлтернӗ.
Коммунистсем шухӑшланӑ тӑрӑх, кун пек пуҫлӑха ӗҫрен кӑлармалла, Шӑмӑршӑри депутатсем вара Сергей Галкин пуҫлӑха ӗҫрен кӑларас темен.
Сергей Галкина унччен ҫын сывлӑхне ҫӑмӑл сиен кӳнӗ тесе пуҫиле кодекспа явап тыттарса штрафлама йышӑннӑ. Депутатсем вара район пуҫлӑхне ӳҫтерсе паракан коэфициентпа усӑ курса преми пама йышӑннӑ.
Аса илтерер: 2025 ҫулхи пуш уйӑхӗнче Сергей Галкин сунарҫӑсемпе канашлу ирттернӗ чухне 70 ҫулти сунарҫӑпа хирӗҫе кайсан ун ҫине алӑ ҫӗкленӗ. Пӑтӑрмах суд тенкелӗ ҫинче вӗҫленнӗ. Пуҫлӑха миравай суд 25 пин тенкӗ штраф хурса панӑ.
Шӑмӑршӑ районӗнче пурӑнакан арҫын апатпа чыхланса кайнӑ. 74 ҫулти мучи апат пыра ларсан сывлайми пулса ларнӑ, ӑна тухтӑрсен пулӑшӑвӗ кирлӗ пулса тухнӑ. Кӑштахран мар, ку лару-тӑрура кашни ҫеккунчӗ паха пулнӑ.
Шар курнӑ ватӑ патне васкавлӑ пулӑшу тухтӑрӗсем ҫийӗнчех тухса кайнӑ. Унтан ӑна васкавлӑн пульницӑна илсе ҫитернӗ, ҫул ҫинче кислородпа сывлаттарса пынӑ.
Патӑрьел районӗнчи тӗп пульницӑри реанимаци уйрӑмӗнче ӑна тухтӑрсен мультидисциплина команди кӗтсе тӑнӑ — йышра эндоскопист, реаниматолог тата хирург пулнӑ.
Ҫав вӑхӑтра арҫыннӑн юнӗнче кислород виҫи 67 процент ҫеҫ юлнӑ.
Вырӑнти анестезипе 6,0 × 0,6 сантиметр пысӑкӑш аш касӑкне касса кӑларнӑ та шурӑ халатлисем ватӑ ҫынна вилӗмрен ҫӑлса хӑварнӑ.
Паян, ҫу уйӑхӗн 1-мӗшӗнче, Чӑваш Республикин тава тивӗҫлӗ артисчӗ Александра Зайцеван ҫуралнӑ кунӗ. Вӑл 65 ҫул тултарать.
Вӑл 1961 ҫулхи ҫу уйӑхӗн 1-мӗшӗнче Шӑмӑршӑ районӗнчи Палтиел ялӗнче ҫуралнӑ. Мускаври М.С. Щепкин ячӗллӗ Аслӑ театр училищинче (институтӗнче) чӑваш студийӗнче вӗреннӗ. 1983 ҫулта унтан вӗренсе тухнӑ хыҫҫӑн ӑна К.В. Иванов ячӗллӗ Чӑваш патшалӑх академи драма театрӗн труппине илнӗ, ҫавӑнтанпа вӑл унта ӗҫлет.
Александра Зайцеван юбилейӗ ячӗпе театрта ҫу уйӑхӗн 6-мӗшӗнче юбилей каҫӗ пулӗ. Театрӑн пресс-служби «Контактра» халӑх тетелӗнчи хӑйӗн пабликӗнче пӗлтернӗ тӑрӑх, ҫав каҫ «артист хӑйӗн ҫавра ҫулне Флорид Буляков пьесипе лартнӑ «Карчӑксем качча каяҫҫӗ» камитпе паллӑ тӑвӗ».
Ака уйӑхӗн 20-24-мӗшӗсенче Чӑваш Енре телерадиовещание вӑхӑтлӑха чарӗҫ. Ку хӑш-пӗр ялсене пырса тивет.
Ҫак тапхӑрта телекурав тата радио чӑрмавсемпе ӗҫлеме пултарӗ. Акан 20-мӗшӗнче (01:00–10:00 сехетсенче) Шупашкара, Ҫӗрпӳ хулине тата Йӗпреҫ поселокне пырса тивӗ ку. Акан 21-мӗшӗнче (11:00–17:00 сехетсенче) Улатӑр округӗнчи Первомайски поселокӗнче йӗркеллӗ ӗҫлемӗ. Акан 22-мӗшӗнче (11:00–17:00 сехетсенче) Шӑмӑршӑ округӗнчи Палтиел ялӗнче вӑхӑтлӑха чарӗҫ. Акан 23-мӗшӗнче (10:00–16:00 сехетсенче) Тӑвайра чарӗҫ. Акан 24-мӗшӗнче (10:00–16:00 сехетсенче) Шупашкар округӗнчи Кивҫурткассинче чӑрмавсем пулӗҫ.
Шӑмӑршӑ округӗнчи Федоровсем изумруд туя паллӑ тунӑ. Вӗсем 55 ҫул пӗрле пурӑнаҫҫӗ.
Ҫамрӑксем каҫхи шкулта паллашнӑ: Алевтина Петровна унта математика предметне вӗрентнӗ. Аграри университетне пӗтернӗ хыҫҫӑн «Правда» колхозра трактористра тата комбайнерта ӗҫлекен Федор Михайлович вара унта вӗренме пынӑ. Вӑл районти общество ӗҫне хастар хутшӑннӑ: комсомол организацийӗн секретарӗ, райкомра инструктор пулнӑ.
Алевтина Петровна Палтиелте ҫуралнӑ. Педагогика институтӗнчен вӗренсе тухсан шкулта математика предметне вӗрентнӗ.
Федоровсем 2 хӗр ҫуратса ӳстернӗ: Мария тата Вероника. Халӗ вӗсем 3 мӑнук, 1 кӗҫӗн мӑнукпа савӑнса пурӑнаҫҫӗ.
Шӑмӑршӑ районӗнчи Васан ялӗнче 63 ҫулти арҫын хӑйӗнчен икӗ ҫул кӗҫӗнрех арҫын ҫине пырса кӗнӗ.
«Киа Рио» водителӗ ҫул варрипе машинӑна хирӗҫ утса пыракан арҫынна таптанӑ. Лешӗ ӳсӗр пулнӑ.
Шар курнин пуҫ мими чӗтреннӗ. Аманнӑскере пульницӑна илсе кайнӑ.
Шӑмӑршӑ округӗнчи Палтиелте пурӑнакан Зейтуна Буданова 95 ҫулта, вӑл халӗ те сӑвӑсем ҫырать.
Шӑпи унӑн ҫӑмӑл пулман: ҫулталӑкра чухне вӑл тӑлӑха юлнӑ, ҫавӑнпа асламӑшӗпе ҫитӗннӗ. Зейтуна Феттахутдиновна колхозра 47 ҫул ӗҫленӗ. Качча кайсан мӑшӑрӗпе 7 ача ҫуратса ӳстернӗ. Халӗ унӑн — 19 мӑнук, 30 кӗҫӗн мӑнук, 5 кӗҫӗн мӑнук. Вӗсемпе савӑнса пурӑнать.
Кинемей халӗ сӑвӑ ҫырать, юрлама кӑмӑллать. Хальччен вӑл 178 юрӑ ҫырнӑ.
Канашлу вӑхӑтӗнче ҫынна тапӑннӑшӑн Шӑмӑршӑ округӗн пуҫлӑхӗ Сергей Галкин судра явап тытнӑ.
Аса илтеретпӗр: 2025 ҫулхи пушӑн 22-мӗшӗнче Шӑмӑршӑ округӗнче сунар сезонне уҫассипе ҫыхӑннӑ канашлура Сергей Галкин 70-ти сунарҫа тапӑннӑ, киревсӗр сӑмахсемпе кӳрентерме пуҫланӑ. Ҫапла сӑмах ҫине сӑмах – алӑсем те хута кайнӑ, пуҫлӑх сунарҫа ҫапнӑ. Суд вӑл унӑн сывлӑхне ҫӑмӑл сиен кӳнӗ тесе йышӑннӑ.
Приговорпа килӗшӳллӗн, Сергей Галкинӑн 25 пин тенкӗ штраф тӳлемелле. Ҫавӑн пекех суд сунарҫӑн граждан тавӑҫне те тивӗҫтернӗ.
Шӑмӑршӑ округӗнчи Кивӗ Шӑмӑршӑра пурӑнакан Яковлевсем пӗрлешнӗренпе 60 ҫул ҫитнӗ. Михаил Павловичпа Клавдия Митрофановна пӗр-пӗрне мӗн ачаран паллаҫҫӗ: кӳршӗре пурӑннӑ, пӗрле выляса ӳснӗ.
Михаил Павлович тивӗҫлӗ канӑва тухиччен механизаторта ӗҫленӗ, Клавдия Митрофановна вара — колхозра, культура ҫуртӗнче. Халӗ те ахаль лармасть, вӑл — волонтер, ятарлӑ ҫар операцине хутшӑнакан салтаксем валли ку таранччен 40 мӑшӑр нуски ҫыхнӑ.
Яковлевсем 5 ача ҫуратса ӳстернӗ. Халӗ 10 мӑнукӗпе, 4 кӗҫӗн мӑнукӗпе савӑнса пурӑнаҫҫӗ.
Чӑваш академи драма театрӗ ҫитес уйӑхра Чӑваш Республикин тава тивӗҫлӗ артисчӗн Николай Сергеевӑн юбилей каҫне ирттерет. Мероприяти нарӑс уйӑхӗн 6-мӗшӗнче, эрнекун, 18 сехетре, пуҫланӗ.
Николай Сергеев 1961 ҫулхи кӑрлач уйӑхӗн 31-мӗшӗнче Шӑмӑршӑ районӗнчи Асанкасси ялӗнче ҫуралнӑ. 1983 ҫулта Мускаври М.С. Щепкин ячӗллӗ Аслӑ театр училищинчен (институтӗнчен) вӗренсе тухнӑранпах чӑваш театрӗнче ӗҫлет.
Юбилее халалланӑ каҫ А.Н. Островскийӗн пьеси тӑрӑх лартнӑ «Юлашки парӑм» спектакле кӑтартӗҫ. Унта Шӑмӑршӑ ҫӗрӗн арӗ Флор Федулыч сӑнарне калӑплать.
+14.3 °C